General William Ward waxa uu u xogwarramayey guddi ka tirsan golaha Senate-ka

Waxanu warbixintiisa ku sheegay inuu jiro qorshe haatan socda oo ah in gacanta lagu qabto magaalada Muqdishu.

warbixinta wararkan

Xoghayaha gaashaandhiga Xisbul Aweys ninka lagu magacaabo Muuse Cabdi Caraale ayaa markii ugu horeeysay si rasmiya shaaca uga qaaday sababahii kalifay inuu Somalia ka baxsado isagoo ka mida Xisbi hubeeysan,kana qeyb qaatay dagaalo lagu hoobtay.

Mr Muuse Caraale oo xaqiijiyay inuu jooga dalka Sudan wuxuu u hadlay si geesinimo iyo run ka buuxdo,wuxuuna faahfaahiyay sababahii kalifay baxsadkiisa uu ku joogo Sudan.

" Marka hore waxaan salaan hawada u marinayaa shacabka Soomaaliyeed ee igu yaqiinay inaan qori sitay,una sheegi jiray inaan Diin Islaam ku dagaalamayo,marka labaad waxaa laga yaabaa in dad badan ila yaabaan hadii aan si runa uga hadlo sababahii igu kalifay inaan tahriib uga soo baxo dalkeyga hooyo,soona maro dhul aanan weligeey dhaayo ka qaadin,weliba anigoo ah shaqsi caadiya"ayuu yiri Muuse Caraale.

Xoghayaha gaashaandhiga ee aan weli xilka laga qaadin wuxuu intaas kadib galay inuu ka sheekeeyo arrimo badan.

"Laba arrimood ayaa ugu xoog badan sababahii aan dalka uga soo cararay,tan koowaad ee khilaafka aniga iyo wiilasha u shaqeeya Al Qaeda iyo Sirdoonka Mareykanka waxay tahay mid ka biloowday Saraakiishii faransiiska ee lagala baxay Hotel Sahafi,waxaa dhacday inaan ka biyo diiday Sarkaalkii ay kaxeeysteen,waxaa dhacday in jidka la ii galay,oo la doonayay in rag ku qabiila Xasan Dahir i dilaan,markii aan ka badbaaday ayaan is qabanay Xasan Dahir Aweys ,arrinkaas wuxuu ku dhamaaday si sharafleh,oo ku saleeysan dhaqanka Somalida,dhacdadaasna waxay kaliftay inuu Sodogeey noqdo Xasan Dahir oo hada gabadhiisa ayaan qabaa sida aad idinkuba hore u qorteen" ayuu yiri Muuse Caraale oo aan hadalka intaas uga harin.

" Fuaad Shongole ayaan xaqiijiyay inuu la shaqeeyo Sirdoonka Mareykanka,cadeeymo badan ayaan ka hayaa sida uu ula shaqeeyo,maahi nin iska dhahay ama iska eedeeyay,waxaan arrinkaas telefoon ugala hadlay nin aan walaalo nahay,kana tirsan iyaga codkeyga ayuu duubay kadibna halkaas waxaa ka biloowday khilaafkii labaad"ayuu yiri Muuse Caraale.

Muuse Caraale oo hadalkiisa koobayay wuxuu tibaaxay in shir ay yeesheen Khawaarijta Al Shabaab ee Ahmed Godane u madaxda yahay ay ku go'aamiyeen in laga taqaluso rag uu isaga ka mid yahay kana tirsan Xisbul Islaam.

" Aniga waxaan go'aansaday inaan sii daayo Sarkaalkii faransiiska anigoon la tashan cid ka mida Khawaarijta Al-Shabaab kuwa aad u taqaanaan anigisu aan u aqaan gangs,Mooryaanta qarniga,kadibna dagaal iyo is gaad gaad qarsoon ayaa noo biloowday,waxay bilaabeen inay dilaan Saraakiisha Xisbiga,markii aan dagaal inaan la galo go,aansadayna waxaa iga diiday Xasan Dahir,waxay weerar ku qaadeen Axmed Madoobe markii aan damcay inaan gurmad u dirana waxaa diiday Xasan Dahir iyo Xasan Turki,waxaan xaqiiqsaday in wiilasha maafiyada xaaraan ku heystaan dalka iyo dadka kadibna waxaa telefoon igula soo hadlay Afhayeenkooda oo aan isku reer hoose nahay,wuxuu igu dhahay Cali dheere,dalka iskaga bax,oo halkaas ku bax,waan kaa celin waayay Fuaad Shongole" ayuu hadalkiisa ku darsaday Mr Caraale.oo qosol iyo isku kalsoonaan laga dareemayay.

Caraale oo aan wax ka weeydiinay cabsida uu ka qabo in loo xiro argagixisinimo,fulin dil iyo afduub dad ajnabiya sida Saraakiishii faransiiska iyo safarkiisa halka uu maray wuxuu ku jawaabay.

"Anigu dimbi waan galay,waxaana ka galay dadkeeyga Soomaaliyeed,ajnabi dimbi kama gelin,waxa leygu heysto waa sii deyntii Sarkaalkii faransiiska,hada waxaan ka codsanayaa dhamaan shacabka Soomaaliyeed inay i cafiyaan,waxaana dadka aan ka dhashay ee Hawiye leeyahay nin iga dambeeya oo Xamar ku nabadgelaa una dhashay Hawiye ma jiro ,Xasan Dahir walaa Shariif,waxaan dhihi karaa waxay dalka u gacan gelinayaan cadaw,waxayna ku dhiman doonaan ama ka soo bixi doonaan iyagoo ildaran,hadii uusan caqliga talin,waxna ka bedelin siyaasadooda,waxaase laga yaabaa in qaarkiin niyada iska dhahdaan isagoo qabiil weyn ka dhashay sidee isaga celin waayay Fuaad Shongole"

Caraale mar wax laga waydiiyay wararka sheegaya inuu dhacay lacag Xisbigu lahaa,wuxuu ku jawaabay "Xisbiga hada waxaa looga kala tegay sodogeey,ma sodogeey ayaan dhacay,taas waa maya,warkiina dhaca aad ka dhigteen waxbaa ka qaldan laakiin taariikh ahaan waxaan ka dhashay reer la wada yaqaan oo xoolo leh,aniguna dagaalkaan ka hor waxaan ahaa ganacsade weyn oo xoolo heysta"

Mr Muuse Caraale Wuxuu codsaday in Waagacusub.com ka baaqsado warar uu ku sifeeyay barabagaan iyo toosh ku ifin shaqsiyadeed,wuxuuna dhinaca kale xusay inuu yahay nin saxaafadda la saaxiiba oo weligii dil iyo hanjabaad u geysan.

Waxaan ku celinay inuu sharaxo safarkiisii baxsadka,wuxuu yiri"Socdaalkeeyga idinkaa hore u sheegteen oo intaanan Khartoum imaan anigoo jooga Jubba ayey walaalaheey i weeydiiyeen sida lagu ogaaday,marka war la qabay xiiso maleh"

Waxaan waydiinay sida ay la tahay siyaasadda Mustaqbalka ee Sodigii Xasan Dahir Aweys,wuxuu yiri "Inta aan ogahay hada waxaa jira buuq ku saleeysan Afhayeenka Xisbiga oo ay Al-Shabaab dhaheen nagu soo wareejiya,Sheekh Xasan Dahir wuu diiday,wuxuu isaga ii sheegay inuusan dalka dhinic uga baxeeyn oo geeri iyo nolol midii uu wajaho ku faraxsan yahay,waa laga yaabaa inuu Al-Shabaab ku biiro laakiin Ciidanku waxaan filayaa inay dhinaca Ahlusunna u geli doonaan"

Waxaan waydiinay inuu ka warqabo wadahadalo u socda Xasan Dahir iyo Madaxda Dowladda Federalka,wuxuu yiri " Maya Maya ma ogi taas,.waxaan ogahay in Xasan Dahir yahay hogaamiye mayal adag,anigu ilama ahan inuu dowladda Shariifka u geli doono"

Xoghayaha mar aan weeydiinay hada wuxuu damacsan yahay iyo halka uu ku socdo,wuxuu yiri "Waxaan damacsanahay inaan wax barto,kuna noolaado dal nabada hadii rabi ii qadiro"

Halka uu wax ka baran rabo iyo waxa uu baran doono labadaba wuu ka gaabsaday.

Waxaan weeydiinay in xilka laga qaaday iyo inkale,wuxuu ku jawaabay " anigaa iska qaaday xilka maxaa yeelay waxaan dadkeyga u laayay qalad,waxaan hada rumeeysnahay in dagaalada ka socda Somalia ama Xisbigeena ama kan Al Shabaab aysan diin Islaam shaqo ku laheyn,waxa loo dagaalamaya waa xukun iyo qabiil,waxaanan ka cabsaneyn inaan iraahdo maskax shisheeye ayaan ku dagaal galnay,anaga Eretria ayaan hub ka heli jirnay,waxaa la saaray cuna qabateyn,kooxda gobolada dhexe ee Suufiyada laftooda waxaa ka buuxa Mooryaantii waaweeyneed oo markii ay waayeen meel ay ku noolaadeen danta ku qasabtay inay culumada talada u dhiibtaan,waxay hub ka helaan Ethiopia,xagaan dowladda Shariifkana waxay ila tahay inaysan dal iyo dad rabin,anigu ma lahi waa gaalo iyo waa gaalo raac hasse yeeshee ilaahbaa laga baqaaye,waa qandaraaslayaal dalka doonaya inay gumeeysi geliyaan"

Markaad naftaada ku aamineysay tahriib iyo dhul halis badan miyaadan ka baqan in gudaha Somalia ay kugu qaban kareen Al-Shabaab xitaa xadka Kenya iyo Somalia ayaan waydiinay,wuxuuna ka yiri"Socdaalkeyga mudo ayaan ka shaqeeynayay,waxaana waaya aragnimo ka helnay dagaalada iyo la joogista gangska la baxay Al Shabaab,xitaa markii aan gudaha joogay,anigoo dagaalka wado,ayeysan aqoon dariiqa aan ku safro"

Waxaan waydiinay maxaad iskugu dhiibi weyday Ahlusunna sidii uu yeelay Gudoomiyahii hore ee Hiiraan Mr Macoow,wuxuu arrinkaas ku sifeeyay mid aan sina ku suurtageleeyn.

"Hadii aan Ahlusuna isu dhiibo runtii iyaga ima aysan dileen inkastoo ay cadaawad xoogan ii qabaan hadana soow qori inaan qaato ma qasabteen,hadii aan qori qaatana soow aniga iyo sodogeey iskuma ridneen xabada,taasi xal uma arko,waxaan ugu dambeyn dhihi karaa QOFKA DIMBI WUU GALAA,GEFNA WUU KA DHACAA LAAKIIN ILAAHEEY WUXUU UGU JECEL YAHAY ADOOMADIISA KAN KA LAABTA,EE KA QOOMAMEEYO,ANIGANA WAAN KA QOOMAMEEYNAYAAN WIXII AAN FALAY OO DHAN"

Caraale marka hadalkiisa la dhuuxo wuxuu noqonayaa nin wax walba runta ka sheegay,oo garwaaqsaday inuu qalad ka galay dalka,dadka iyo diinta,taasina waa mid uu garwaaqsan karo qofkii xumaan ka tirsaday ama uu wiil iyo waalid ka dilay maxaa yeelay dalka waxa ka socda ayaa lagu tilmaami karaa masiibo iyo mucjiso taariikhiya.

03 March 2010 Waagacusub Media